Pahlawan

Karanganyar, 10 November 2018 
A.N. Setiawan

sapa waé sing gawéané nglawan sipat ala 
sapa waé sing nduwèni watak utama

sliramu iku pahlawan sing sejati 
tansah waspada lan ngati-ati 
éling satengahing éling

saben dina ora kendhat nandur kautaman 
lan ora pernah ngundhuh tanduranmu dhéwé

kaya wit jati sing mbok tandur nèng kebonmu kaé 
anak putu sing bakal nikmati kamulyanmu 
sliramu pancèn pahlawan

Ing Pinggir Dalan

Karanganyar, 9 November 2018

A.N. Setiawan

ana geni jroning paningalanmu

abang sétan mulat-mulat

nyamber mripat lan atiku

iku dudu sliramu sing tak-kenal

iku dudu jeneng sing mbok sandhang

apa sliramu isih kurang pangan?

Tresna Kaping Pisan

Karanganyar, 8 November 2018

A.N. Setiawan

taksebut jenengmu paling éndah

ing antaraning kaéndahan-kaéndahan

kembang mawar kang megar ing pelataran

kembang kenikir kang tansah dhikir

sisa-sisa banyu udan wingi bengi kang nètès

lan embun-embun kang bening

taksebut jenengmu paling éndah

ing antaraning ati lan lathi

Dalan Anyar

Karanganyar, 5 Februari 2018

A.N. Setiawan

dalan alus amba kagelar aspal anyar 

ngétan ngulon tansah banter tenan 

amarga rindik wis mesthi ketinggalan 

gas tansah ditambah ngglegar nyigar 

sing penting tekan ora perduli liyan 

yak-yakan salip-salipan édan-édanan 

ati bungah rumangsa paling sangar 

ora lurus ora tikungan tanpa ukuran 

dlasaran srèmpèdan tubruk tabrakan 

mesin-mesin kesétanan mangar-mangar

Amarilisari

Karanganyar, 10 Januari 2018 
A.N. Setiawan


jingganing kusuma megar dumadi 
embun-embun nètès nelesi katon 
ron-ron mbeksa asmara sejati 
kasirep atising angin saka kulon

kalandara sumunar mekar alon 
cahyané sumurup ing ilining banyu 
kadya emas sinangling kalangon 
paring daya kasampurnaning hayu

Ratnakanya

Karanganyar, 9 Januari 2018 
A.N. Setiawan


sléndhang sutrané mobat-mabit 
ririh mulas soré 
kuning ayu mratani langit 
rèrèh nengsemaké 
kang manggon ing kulon 
ruruh manis èsemé 
alon-alon kelakon

Joglo

Karanganyar, 7 Januari 2018 

A.N. Setiawan

omah wis owah 

trah wis pecah 

lemah wis pisah 

crah dadi bubrah 

ora nggenah, ora nggenah

omah ora owah 

trah saya tambah 

lemah saya berkah 

mbah dadi bungah 

aku nggenah, aku nggenah

Tentrem

Karanganyar, 6 Januari 2018 
A.N. Setiawan


ayem mrembes 
ngèlèkaké was kang nggogrogi 
kéntir kagulung kebes 
mak lap nganteng-antengi 
grimis ora saya deres 
grimis ora saya deres 
grimis ora saya deres 
kali ora sida kèli

Sarèh

Karanganyar, 5 Januari 2018 
A.N. Setiawan


mung sarèh 
bakal ngrumangsani 
ana Geni 
ngobong ati

Sun Gegurit

Karanganyar, 3 Januari 2018
A.N. Setiawan


kaanan jaman saiki 
tèknologi saya ndadi 
cepet kebak inovasi 
tuwa enom ora kèri 
srawung makarya nyawiji 
tansah njaga ati lathi 
uga bisa ngerim driji

Kuwat Iku

Karanganyar, 2 Januari 2018
A.N. Setiawan


dudu wong sing bisa nglunthung donya 
dudu wong sing bisa nggantung nyawa 
kaya déné banyu udan nyirep panasing angkara 
kaya déné sliramu bisa mbekeb kareping nepsu 
ora usah kesusu, ora usah kesusu, nggugu utamaning laku

Rasa Donya

Karanganyar, 1 Agustus 2015
A.N. Setiawan


ana tresna jroning rasa
manunggal dadi crita
nyata ing donya
antaraning manungsa
lan sing rumangsa
sapa?

Tiyang Alit

Depok, 23 Mei 2014 
A.N. Setiawan


patang rasa jroning ati
campuring rasa dadi siji
dhuh Langit,
tangismu uga tangisku
bungahmu uga bungahku
petengmu dadi petengku
padhangku dadi padhangku
Gusti, kula mung tiyang alit

Parikan: Salat Pasa Mati

Depok, 14 November 2013
A.N. Setiawan


Wong salat madhep keblat,
madhep keblat mung ragane,
dadi rakyat kerep maksiyat,
neng akerat rekasa lakune.

Wong pasa dhuwur prihatine,
dhuwur prihatine marang Gusti,
aja sembrana aja gumedhe,
ing tembe buri bakal mati.

Wong mati mujur ngalor,
mujur ngalor ora bisa obah,
dadi bupati ja dadi koruptor,
dadi koruptor dum-duman rupiyah.

Tembang Urip

Bekasi, 26 April 2013

A.N. Setiawan

wosing dhiri, ana tembung

ana karep

maksud, isi

ambegan sajroning urip

urip ing jagad

kang nyata iki

kang sedhela iki

Mega Biru

Depok, 16 Maret 2013

dening Arif Nur Setiawan

daksawang mega biru iku,

dakcenthelake gegayuhan uripku,

apa iku salah?

mung wae aku pancen eling

ora bakal urip ing ngakasa, Biyung

Bapa, aku wus diwasa

matur sembah nuwun ing samubarang prakara

mugaa kasarasan, kamulyan, kabagjan iku tansah nyawiji

ing mburi.

*Sumber Gambar: FUSI